AL  VUTAZIÔN

A v sì fàt insulfalnê(1)

par la vója chi v’à fàt,

cluchelà l’éra invalnê

o förši un bdòcc arfàt,(2)

l’à scôrš (3)pr’un dè intir(4)

rugènd(5)cóma un danê(6)

in piaža e int i cantir

e u v’à pròpi inšulfalnê.

A scórar(7)cun l’artôran(8)

l’è un uşânza de dialèt

e s’i tô(9)la mân a e’tôran(10)

it fà al vidi sénža filèt:

a m’aracmând a tót

……a m’aracmând

gvardì cóm’a v sì ardót

..di qvând in qvând.

Al paröli ch’i s’à dèt

avdirëm(11)s’i li mantén

l’è sôl ròba par purèt,

mô a lô žērt u i cunvén.

                  E.’d Bartòž

(1)  insulfalnê = abbindolato

(2)  bdòcc arfàt = pidocchio rifatto

(3)  l’à scôrš = ha parlato

(4)  dè intir = giorno intero

(5)  rugènd = urlando

(6)  danê = dannato

(7)  A scórar = a parlare

(8)   artôran = ritorno

(9)   si tô = se prendono

(10) tôran = tornio

(11) avdirëm = vedremo