LA FARTËDA(1)

Sénža vlé’ pr’óna fartëda

avëm fàt ’na scumachëda(2)

l’è ’n pò bižàra šta paröla

mai sintida prèma ’d’ôra.

Al dóni a ca al fà ’l prövi

tulènd int al mân a gl’övi

e nénc s’agl’avès pu vója

šó int e’tulir(3)al fà la sfója.(4)

Dòp avé fàt dal prövi

a gl’arvès cal dó övi

muntènd sôl la biùda(5)

cla vénža pu şbàtùda,

armanènd alžira e ’vlutëda(6)

da şvaršê(7) sôra ’na fartëda.

Nò şminghê:(8)nôş muschêda(9)

sêl, pêvar e limôn ’na gratêda,

e a piašé t’à i pu mèt di žulót,(10)

mó la verdura e i urtaž cót(11)

j’è da nô cóm’e’fóm int i ócc,(12)

nénc si arìva al pali di žnócc.(13)

                          E. ’d Bartòž

  (1)    LA FARTËDA = La frittata

  (2)    scumachëda = sbattuta d’uova

  (3)    šó e’tulir = sulla spianatoia/tagliere

  (4)    la sfója = la pasta sfoglia

  (5)    la biùda  = chiaro dell’ovo

  (6)    alžira e’vlutëda = leggera e vellutata

  (7)    şvaršê = rovesciare

  (8)    Nò şminghê = non dimenticare

  (9)    nôş muschêda   = noce moscata

(10)    žulót = cipollotti

(11)    urtaž cót  = erba cotta

(12)    e’fóm int i ócc = il fumo negl’occhi

(13)    al pali di ’žnócc = alle rotule