E’ BINDULÊR (1)

Quant’ch’u j n’è chi bindöla,(2)
i babin prèma d’andê a scöla,
i burdèl strupênd’s e’margôş,(3)
burdëli prèma’d truvê murôş,(4)

cvi chi žira atôrna e’bèndul(5)
dóp un pò i dvénta žèmbul( 6)
e žirènd sémpar atôrna a l’è
in và mëj(7)pió in là da l’è.

’d sti animéli chi bindöla(8)
in scapa, mó žirènd e fröla
i tira só l’acva da sóta tëra,
da póž cun e’ fónd ’d gêra.(9)

Agl’è bèš-ci(10)da bèndul
cal pesta(11)i žócal ’d êrta,
mó la n’è  raža da pàscul
parchè al chéga(12)da pêrta,

e žērt dóni, prèma’d scapê(13)
bindulènd invéži d’andê fôra,
al s stulgarèb(14)int un canapè,
mitènd vluntira la câna a l’öra.(15)

                          E. ’d Bartòž

(1)   E’ BINDULÊR = il perdere tempo
(2)   chi bindöla = che girano intorno
(3)   strupênd’š e’margôş = pulendosi il muco
(4)   murôş = fidanzato
(5)   e’bèndul = routa con bigonci
(6)   žèmbul = stupidi
(7)   mëj = mai
(8)   chi bindöla = girando tirano su acqua
(9)  ’d gêra = ghiaia
(10) bèš-ci = bestie
(11) cal pesta = che pestano
(12) al chéga = defecano
(13) prèma’d scapê =prima di  uscire di casa
(14) al s stulgarèb = si sdraierebbero
(15) la câna a l’öra = la canna all’ombra