E’ TULIR (1)

la pasta cômpra la şbrèša
e cal dóni ch’al n’à alşir(2)
al n’impasta sôra st’ëša(3)
nénc se in ca u j’è e’tulir;

an morta(4)pió int e’ tulir
preferènd cumprê l in žir,
mó u n’è e’pân(5)d’na völta
e adëš l’a t pò andê störta.

Sa fasémia dal tajadëli(6)
a tirémia ’na ciòpa(8)d’övi(9)
e ciamènd šó cal burdëli(7)
a n’imparèmia speš dal növi;

e se in ca t’avìtia un mört
t’a n gni putìtia fê un tört
e i manfrìgul,(10)l’éra la vşéna(11)
che a ca šua la i fà ’d mulina.(12)

Un intiga(13)uşânza la vléva
par rigvêrd de mört int l’ëša,
druvê che tulir u n s putéva
par nò fê la spója(14)sôra cl’ëša.(15)

                             E.’d Bartòž

(1)    E’ TULIR = il tagliere
(2)    ch’al n’à alşir= che non hanno tempo
(3)    st’ëša = quest’asse
(4)    al n morta = non impastano
(5)    e’pân = il pane
(6 )   dal tajadëli = delle tagliatelle
(7)    cal burdëli = quelle ragazze
(8)   ’na ciòpa = un paio
(9)    d’ovi = d’uova
(10)  i manfrigul = i malfattini
(11)  la vsena = la vicina
(12) ’d muléna  =di  mollica
(13)  Un intiga = un antica
(14)  la spója = la pasta
(15)  sôra cl’ëša = sopra quell’asse di legno
                               ( s’intende  del tagliere )