I FIÙR(1)

U n’é bastânt i ócc a rimirêj(2)
pr’é bôn udôr ch’i manda,
l’é bastânt tri fiùr par praşintêj
o piantêj a maž int la veranda;

u n’i vô pu cšè tânta abilitê
par cumpletê un arēdamént
dimustrènd ’na šignurìlitê,
ch’la i vô in žirt mumént.

Cvând t’à i vìd in fiùridura
sôra al šēvi o int i žardèn
t’à t sént ciapê da şvēržura(3)
st’vìv int e’ mez de caşén;

al žitê a gl’è armàsti spój
pr’e’tràfic e al pórbji stili(4)
u j’è vanžê(5)sôl dal nòj(6)
sénža fiùr e gvêrgi ustili.(7)

I fiùr pió brót j’è cvi de vén
ch’i fiùrês ’n déntar al bót(8)
e nénc se a nô un s cunvén
l’è ža andê da mêl(9)pròpi tót.

                          E. ’d Bartòž

(1) I FIÙR = I fiori
(2) a rimirêj = ad ammirarli
(3) da sveržura = da solletico
(4) pórbji stili  = polveri sottili
(5) vanžê = rimaste
(6) dal nòj = delle noie
(7) gvêrgi ustili = vigili ostili
(8) déntar al bót = dentro le botti
(9) da mêl = a male