In istêda e tót al nòti
as truvémia in piazèta
e spes fasênd al bòti
par magnèn pió d’na fèta
l’éra pri cómar un mêgh(1)
t’à n’scapìtia sta n’e’ pêgh,(2)
l’éra sèmpar suridént
nénca s l’éra sénza dént.
S u i faséva e’ tasël(3)
u t futéva(4)int e’pió bël
ciavéndat(5)int e’ prëzi
magnênd cvèl sénza e’dêzi,(6)
u i tnéva a mòl(7)int e’ giaz,(8)
da cl’ôra, l’éra preciş pri cazàz,(9)
gvardénd cla vëcia mastlaza(10)
sèmpar pina ’d acva giaza.
L’éra un möd ’d pasê e’ témp,
mó ’na fèta e un pó ’d malizia,
t’à la şlampìtia(11) int un lâmp,
l’éra mëj dó(12)e crepi l’avarizia.
E. ’d Bartòz
1) un mêgh = un mago
2) n’e’ pêgh = non lo pagavi
3) e’ tasël = il tassello
4) u t futéva = ti imbrogliava
5) ciavéndat = fregandoti
6) e’dêzi = il dazio
7) tnéva a mòl = tenere a bagno
8) int e’ giaz = nel ghiaccio
9) cazàz = sciocconi
10) vëcia mastlaza = vecchia mastella
11) la şlampìtia = la divoravi
12) mëj dó = meglio due