I à dèt che da utóbar (1)
un s vaga pió a supâr
mè ch’a n sò catalizê
an s’avrèb cóma fê,
um piasrèb viazê ancôra
cun la mi vëcia gramadôra
se però un s putrà pió andê
a sarò custrèt a pedalê.
a la putrèb fê mètr’a metên (2)
mó a n sò se um cunvên,
però cun sta gl’impusiziôn
im custrènz a la rutamaziôn,
e tra l’êtar am farò schiv
custrèt ’d azônzi dl’aditiv(3)
am rasegnêrò d’andê a pè
s’a nò i bajòc(4) par cumprè.
Mó a la tnirò ancôra ’na masa
cla mi bëla e vëcia carcasa
e par fê instizì chi bêrbazvân (5)
a la farmarò sóta un capân.
E.’d Bartòz
1) da utóbar = da ottobre
2) fê mètr’a metên = farla mettere a metano
3) azônzi dl’aditiv = aggiungere dell’additivo
4) i bajòc = i quattrini
5) chi bêrbazvân = quei barbagianni