Ló l’éra êt che bôn
’d fê dla castagnaza(1)
vindénd’la in autôn (2)
d’intorn’ a la piaza
Chi chi n’avdéva
’déntar a e’ padlôn(3)
cóm’ ch’u la tajéva(4)
sôra che grambialôn.
Còta l’éra de culôr
dla gósa ’d castâgn (5)
fasénd un fat udôr
da impinì ’n gavâgn, (6)
t’a la tulìtia inguplêda (7)
int un tòc ’d chêrta zala (8)
e int un àtum divurêda
cóm’al bèš-ci(9)int la stala,
u in vindéva par sët castigh(10)
vindénd’la nènc’a i imbarig (11)
e che s u j éra pu i pignul (12)
la piaşéva’d pió ai rumagnul.
E. ’d Bartoz
1) dla castagnaza = del castagnaccio
2) in autôn = in autunno
3) e’ padlôn = il contenitore per cuocere
4) la tajéva = la tagliava
5) gósa ’d castâgn = buccia di castagna
6) ’n gavâgn = un paniere
7) inguplêda = avvolta
8) tòc ’d chêrta zala = pezzo di carta gialla
9) al bèš-ci = le bestie
10) par sët castigh = un mucchio
11) ’a i imbarig = agli ubriachi
12)i pignul = i pinoli