LA BATDÙRA (1)

Ogni ân u j’è ’na sêgra
int e’paēş ad Albârēt;(2)
l’è ’na fira un pò mêgra
se l’arcölt l’è pió purèt.

mó se e’grân l’é fàt ’d lój(3)
t’al pu mēdar(4)e t’al pu cój,(5)
mej avé pió bşógn ’d bàtar(6)
che nò avê gnit da mēdar,

mó s t cménž a mēd’r a mân
cménž’a žógn(7),par Ša’Žvân(8)
e se in che pòst u j’é pöc grân
l’è parchè u j’è pöc gvadâgn.

La batdùra l’è un cvël šēri      
par fêla bén u i vô critēri
e ’d Albârēt u j’é st’uşânža
’d lavurê bén e cun cuştânža;

’d Albarēt l’é ’na tradižiôn
èsar alìgar pr’e’ šu vén bôn,
l’é un pchê ’d nò fêla in agóst
che in fērji us bév pió ’d góšt,

mó a i andèm lì stèš cun amig
par magnê bén e par šët castig,(9)
e nénc se t’é cvêlc pinšir adòš
par che dè t’a t’é scròl da dòš.(10)
                     
                               E.’d Bartòž

  (1)  LA BATDÙRA   = la trebbiatura
  (2)  Albârēt = Albereto
  (3)  fàt ’d lój = maturo in luglio
  (4)  pu mēdar   = puoi mietere
  (5)  pu cój = puoi raccogliere
  (6) ’d bàtar   = di trebbiare
  (7)  cménz’a žógn  = cominci a giugno
  (8)  par Ša’Žvân = a San Giovanni
  (9)  par šët castig = a non finire
(10)  scròl da dòš = liberi d’addosso