É  GHÊVAR

Cóm’ as faräl sénza ghêvar
t’an pu nè spènzar,nè smövar
e tè magari tulènd’l a pòsta
t’al dròv par dê zó cròsta.

A ras-cêm sôra l’acva e sêl
sbasêndal sénza fêj de mêl
t’at sgavagn déntar i cavdén
e t’a le sèmpar int al mén,

se mài, t’al tròv spes in zìr
bagnèndas u n’è gnânc alzìr
e dòp cavê dulènd s al cósti
a se ragném par dê zó al pòsti.

Ste ghêvar l’ è ‘na puténza
nisôn ad nô e pò’ fê sénza
sénz’ ad lô e mànca la bêsa
par cvèst t’a nè las in pêsa.

E cvând ch’us spaca in pônta
t’al smónt e t’ai fé ‘na zônta;
a la fén t’al bôt int e canèl
par s-ciarêl e mantnil bël

E.ad Bartoz

ras-cêm = raschiare
sgavagn = districarsi
cavdén  =  bacini salanti
s-ciarêl  =  risciacquare